דער בלאט איז איבערגעזעצט געווארן פון ענגליש. אויב עפעס איז נישט קלאר, רופט אונז אויף (718) 351-3045.
אייער טראגבארער אולטראסאנישער נעבולייזער, טריט נאך טריט.
א קליינער נעבולייזער וואס פאסט אריין אין א קעשענע, און וואס מען קען אנלאדן. ער מאכט פון פליסיגער מעדיצין א דינעם נעפל, וואס מען אטעמט אריין דורך א מאסקע אדער א מויל־שטיקל. עס איז דא א מאדעל פאר קינדער און א מאדעל פאר דערוואקסענע, און יעדער ארבעט א ביסל אנדערש. קלייבט אויס אייער מאדעל אונטן.
האט איר פראגעס? רופט אונז אויף (718) 351-3045, מאנטאג ביז פרייטאג, פון 9 אין דער פרי ביז 5 נאך מיטאג, ניו יארקער צייט.
וועלכן מאדעל האט איר?
שפרינגט צו א טייל פונעם ווידעא
זעט ווי מען שטעלט אים צונויף, און ווי ער ארבעט.
דער ווידעא ווייזט דעם טראגבארן נעבולייזער פון אנהייב ביז סוף. יעדער טריט איז אויך אנגעשריבן אונטן, און איר קענט האלטן א קאפיע אויף אייער טעלעפאן אדער עס אויסדרוקן.
דער ווידעא איז אויף ענגליש.
ווידעא: https://www.youtube.com/watch?v=QypMcxyrtig
נאך צו זען אדער אראפצולאדן
- דאס אריגינעלע אינסטרוקציע־ביכל פארן קינדער־מאדעלעפנטלאדט אראפ(אויף ענגליש)
- דאס אריגינעלע אינסטרוקציע־ביכל פארן מאדעל פאר דערוואקסענעעפנטלאדט אראפ(אויף ענגליש)
- קינדער־מאדעל: נאר דער וועגווייזערעפנטלאדט אראפ
- מאדעל פאר דערוואקסענע: נאר דער וועגווייזערעפנטלאדט אראפ
- וואס ליגט אין קעסטלעפנטלאדט אראפ(אויף ענגליש)
קוקט אז איר האט אלץ.
- דער נעבולייזער, מיט זיין מעדיצין־בעכערל און א היטל וואס דעקט צו דעם נעפל־אויסגאנג
- מאסקע פאר דערוואקסענע (די גרעסערע)
- קינדער־מאסקע (די קלענערע)
- מויל־שטיקל
- USB לאד־קאבל (USB-A צו USB-C)
- אינסטרוקציע־ביכל
פעלט עפעס, אדער איז עפעס צעבראכן? רופט אונז אויף (718) 351-3045, און מיר וועלן אייך העלפן.
קינדער־מאדעל
בלוי, גרין, אראנזש אדער ווייס, מיט א געמאלט פנימל. דער אראנזשער שנאבל איז דאס אן־אויס־קנעפל.
לערנט זיך קענען די טיילן
- מעדיצין־בעכערל, מיט א דעקל אויבן וואס עפנט זיך ארויף; עס האלט ביז 10 מ״ל
- נעפל־אויסגאנג פון פארנט, וואו די מאסקע אדער דאס מויל־שטיקל קומט ארויף; דאס היטל דעקט אים צו ווען מען ניצט אים נישט
- אן־אויס־קנעפל: דער אראנזשער שנאבל פון פארנט
- לעמפל פון פארנט: ווייזט ווען ער לאדט זיך, ווען עס גייט דער רייניג־פראגראם, און אז ער ארבעט
- אפלאז־קנעפל הינטן, כדי אראפצונעמען דאס בעכערל
- USB-C לאד־לעכל הינטן
אנלאדן
שטעקט אריין
שטעקט אריין דעם USB-C עק פונעם קאבל אינעם לאד־לעכל הינטן. דעם USB-A עק שטעקט אריין אין א USB אדאפטער אין אן אוטלעט אין דער וואנט, אדער אין א קאמפיוטער.
קוקט אויפן לעמפל
דאס לעמפל בלייבט געל בשעת ער לאדט זיך, און ווערט גרין ווען די באטארייע איז פול.
קענט אייער באטארייע
15 מינוט אנלאדן גיט ביז צוויי שעה ניצן. אויב דער נעבולייזער ליגט אוועקגעלייגט א צייט, לאדט אים אן כאטש איין מאל אין צוויי חדשים, כדי די באטארייע זאל בלייבן געזונט.
יעדע באהאנדלונג
גרייט זיך צו
וואשט די הענט, און זעט אז דאס בעכערל, די מאסקע און דאס מויל־שטיקל זאלן זיין ריין און טרוקן. זעצט זיך גלייך.
פילט אן דאס בעכערל
עפנט דאס דעקל און גיסט אריין די מעדיצין וואס דער דאקטער האט פארשריבן. פילט נישט מער ווי 10 מ״ל. מאכט צו דאס דעקל ביז עס קליקט.
טוט אן די מאסקע אדער דאס מויל־שטיקל
נעמט אראפ דאס היטל פון פארנט, און שטופט די מאסקע אדער דאס מויל־שטיקל אויפן קיילעכדיגן אויסגאנג. פאר עופעלעך און קינדער, ניצט א מאסקע וואס דעקט צו סיי די נאז סיי דאס מויל.
מאכט אן און קלייבט אויס א גיכקייט
דריקט דאס אן־אויס־קנעפל. דריקט נאך א מאל כדי צו בייטן צווישן שטארק, מיטל און שוואך. א נעפל וואס קומט אן אן אויפהער און א בלוי לעמפל ווייזן אז ער ארבעט.
אטעמט נארמאל
האלט דעם נעבולייזער גלייך ארויף. נעמט ארום דאס מויל־שטיקל מיט די ליפן, אדער לייגט די מאסקע אויף דער נאז און אויפן מויל, און אטעמט פאמעלעך און נארמאל.
גיט אים צייט
א דאזע פון 5 מ״ל דויערט בערך 15 מינוט אויף שטארק, 20 אויף מיטל, אדער 30 אויף שוואך. ער שטעלט זיך אפ אליין נאך 20 מינוט; אויב ס'איז געבליבן מעדיצין, דריקט דאס קנעפל כדי ווייטער צו גיין.
ענדיגט
הערט אויף ווען דער קול בייט זיך, אדער ווען ער שטעלט זיך אפ ווייל דאס בעכערל איז ליידיג. ס'איז נארמאל אז עס בלייבן א פאר טראפנס אין בעכערל.
א באהאנדלונג פאר א קינד
האלט די מאסקע ענג צום פנים די גאנצע צייט. אפילו ווען מען האלט זי נאר א ביסל אוועק פונעם פנים, גייט א סך פון דער מעדיצין פארלוירן איידער זי קומט אן צו די לונגען. א קינד וואס וויינט אטעמט אויך אריין ווייניגער מעדיצין. דערפאר העלפט טאקע א רואיגע רגע, א באליבטע מעשה, אדער א ביכל.
עצות
- האלט אים גלייך ארויף די גאנצע צייט, כדי די מעדיצין זאל בלייבן אויפן נעפל־פלעטל.
- ניצט נאר די פליסיגע מעדיצין אדער סיילין וואס דער דאקטער האט פארשריבן. קיינמאל נישט קיין פשוט וואסער, אייל, מילך אדער געדיכטע פליסיגקייטן.
- קינדער זאלן אים ניצן נאר ווען א דערוואקסענער קוקט צו. לאזט קיינמאל נישט איבער א קינד אליין מיט אים.
רייניגן, נאך יעדער באהאנדלונג
ליידיגט אויס דאס בעכערל
גיסט אויס די מעדיצין וואס איז געבליבן אין בעכערל.
נעמט אראפ דאס בעכערל ווען עס דארף זיין
דריקט דאס אפלאז־קנעפל הינטן, און שטופט דאס בעכערל פארויס כדי עס אראפצורוקן. שטופט עס צוריק ארויף ביז עס קליקט.
רייניגט די מאסקע און דאס מויל־שטיקל
נעמט זיי אראפ, און ווישט זיי אפ מיט א מעדיצינישן אלקאהאל־טיכעלע, אדער ווייקט זיי איין כדי זיי צו דעזינפיצירן. שווענקט זיי אויס אונטער ווארעם וואסער, און לאזט זיי טרוקענען אין דער לופט.
לאזט לויפן דעם זעלבסט־רייניג־פראגראם
גיסט אריין בערך 6 מ״ל ריין וואסער אין בעכערל, מאכט צו דאס דעקל, און האלט געדריקט דאס אן־אויס־קנעפל בערך 5 סעקונדעס. דאס לעמפל בלינקט גרין און רויט בשעת ער רייניגט. אטעמט נישט אריין דעם נעפל.
ווישט אפ און לייגט אוועק
ווישט אפ דעם נעבולייזער פון דרויסן מיט א ווייכן, טרוקענעם, ריינעם האנטעך. שווענקט קיינמאל נישט אויס דעם נעבולייזער, און לייגט אים קיינמאל נישט אריין אין וואסער. טוט צוריק אן דאס היטל, און האלט אים אין א קילן, טרוקענעם ארט.
וואס מען טאר נישט טאן
- רירט קיינמאל נישט אן דאס קליינע מעטאלענע נעפל־פלעטל אינעווייניג אינעם אויסגאנג: נישט מיט די פינגער, נישט מיט בערשטלעך, און נישט מיט עפעס הארטס.
- לאזט אים קיינמאל נישט ארבעטן מיט א ליידיגן בעכערל.
- שטעלט אים קיינמאל נישט אויף א הייסן ארט.
אויב עפעס ארבעט נישט
ווייניג נעפל, אדער גאר קיין נעפל
- גיסט צו מעדיצין; עס קען זיין אז ס'איז נישט גענוג אין בעכערל.
- האלט דעם נעבולייזער גלייך ארויף.
- גאר געדיכטע מעדיצינען ווערן אפשר נישט קיין נעפל. פרעגט אייער אפטייקער.
- אין א קאלטן צימער, לאזט אים לויפן מיט 3 ביז 6 מ״ל הייס וואסער ביז עס ווערט אויסגענוצט (אטעמט עס נישט אריין), און פרובירט דערנאך נאך א מאל.
דער נעפל איז שוואך
- לאדט אן די באטארייע.
- קלאפט לייכט אויפן בעכערל אדער שאקלט עס לייכט, כדי ארויסצוטרייבן די לופט־בלעזלעך, און מאכט אים דערנאך ווידער אן.
- רייניגט דאס נעפל־פלעטל: לאזט אים לויפן מיט 3 ביז 6 מ״ל וואסער מיט 2 אדער 3 טראפנס עסיג, ביז עס ווערט אויסגענוצט (אטעמט עס נישט אריין), און רייניגט דערנאך דאס בעכערל.
- אויב גארנישט פון דעם העלפט, קען זיין אז דאס נעפל־פלעטל איז אפגענוצט. רופט אונז.
ס'איז דא מעדיצין אין בעכערל, אבער קיין נעפל נישט
- לופט־בלעזלעך קענען פארשטאפן דאס נעפל־פלעטל ווען מען גיסט אריין. קלאפט לייכט אויפן בעכערל אדער שאקלט עס לייכט, און מאכט אים דערנאך ווידער אן.
עס בלייבט א ביסל מעדיצין צום סוף
- דאס איז נארמאל. הערט אויף ווען דער קול בייט זיך, אדער ווען ער שטעלט זיך אפ אליין.
טעכנישע פרטים
| וואג | בערך 100 גראם (3.5 אונצן) |
|---|---|
| גרייס | 118 מ״מ הויך, 39.5 מ״מ ברייט (בערך 4.6 × 1.6 אינטש) |
| מעדיצין־בעכערל | ביז 10 מ״ל |
| וויפל נעפל | בערך 0.2 מ״ל א מינוט |
| גרייס פון די טיילעכלעך | 5 מיקראן אדער קלענער |
| גערויש | 50 דעציבעל אדער שטילער |
| באטארייע | איינגעבויטע ליטיום־באטארייע; ביז 2 שעה ניצן נאך 15 מינוט אנלאדן |
| אנלאדן | USB-A צו USB-C קאבל, 5 וואלט / 1 אמפער |
| שטעלט זיך אפ אליין | נאך 20 מינוט |
| טעמפעראטור ביים ניצן | צווישן 5 און 40 גראד צעלסיוס (41 ביז 104 גראד פארענהייט) |
מאדעל פאר דערוואקסענע
אראנזש, מיט א קיילעכדיג ווייס אן־אויס־קנעפל און א קליין לעמפל איבער אים.
לערנט זיך קענען די טיילן
- מעדיצין־בעכערל, מיט א דעקל וואס עפנט זיך; עס האלט בערך 10 מ״ל
- נעפל־אויסגאנג פון פארנט, וואו די מאסקע אדער דאס מויל־שטיקל קומט ארויף; דאס היטל דעקט אים צו ווען מען ניצט אים נישט
- קיילעכדיג אן־אויס־קנעפל
- לעמפל איבערן קנעפל: ווייזט די גיכקייט, דאס אנלאדן, און ווען די באטארייע איז שוואך
- אפלאז־קנעפל הינטן, מיטן ווארט PUSH, כדי אראפצונעמען דאס בעכערל
- USB-C לאד־לעכל הינטן, הינטער א קליינעם גומענעם פראפן
אנלאדן
שטעקט אריין
עפנט דעם גומענעם פראפן הינטן, און שטעקט אריין דעם USB-C עק פונעם קאבל. דעם USB-A עק שטעקט אריין אין א USB אדאפטער אין אן אוטלעט אין דער וואנט, אדער אין א קאמפיוטער.
קוקט אויפן לעמפל
דאס לעמפל איז געל בשעת ער לאדט זיך, און ווערט גרין אן בלינקען ווען די באטארייע איז פול.
ציט ארויס דעם קאבל ווען די באטארייע איז פול
ציט ארויס דעם קאבל און מאכט צו דעם גומענעם פראפן. דער נעבולייזער ארבעט נישט בשעת ער לאדט זיך.
קענט אייער באטארייע
15 מינוט אנלאדן גיט ביז צוויי שעה ניצן. א געל לעמפל וואס בלינקט מיינט אז די באטארייע איז שוואך. אויב ער ליגט אוועקגעלייגט א צייט, לאדט אים אן כאטש איין מאל אין דריי חדשים.
יעדע באהאנדלונג
גרייט זיך צו
וואשט די הענט, און זעט אז דאס בעכערל, די מאסקע און דאס מויל־שטיקל זאלן זיין ריין און טרוקן.
נעמט אראפ דאס בעכערל
דריקט און האלט דאס PUSH־קנעפל הינטן, און רוקט דאס בעכערל פארויס אראפ פונעם אפאראט.
גיסט אריין די מעדיצין
עפנט דאס דעקל פונעם בעכערל, און גיסט אריין די מעדיצין וואס דער דאקטער האט פארשריבן: כאטש 1 מ״ל, און נישט העכער פונעם שטריך אויפן בעכערל. מאכט שטארק צו דאס דעקל.
שטעלט צוריק דאס בעכערל
רוקט דאס בעכערל צוריק אויף זיין ארט ביז עס קליקט. די קליינע מעטאלענע קאנטאקטן צווישן דעם בעכערל און דעם אפאראט מוזן זיין ריין און טרוקן, אנישט קען ער זיך נישט אנהייבן.
טוט אן די מאסקע אדער דאס מויל־שטיקל
נעמט אראפ דאס היטל פון פארנט, און שטופט די מאסקע אדער דאס מויל־שטיקל אויפן קיילעכדיגן אויסגאנג.
מאכט אן און קלייבט אויס א גיכקייט
דריקט און האלט דאס אן־אויס־קנעפל; דער נעפל הייבט אן אין בערך 2 סעקונדעס. יעדער קורצער דריק בייט די גיכקייט: גרין איז נידעריג, בלוי איז מיטל, געל איז הויך.
אטעמט נארמאל
האלט אים פעסט, זייט רואיג, און אטעמט נארמאל. פארדעקט נישט די לופט־לעכער אויף דער מאסקע.
ענדיגט
צום סוף, נייגט דעם פאדערשטן טייל א ביסל צו אייך, כדי די לעצטע טראפנס זאלן אנקומען צום נעפל־פלעטל. ער שטעלט זיך אפ ווען דאס בעכערל איז ליידיג, אדער נאך 20 מינוט. כדי אים אליין אפצושטעלן, האלט דאס אן־אויס־קנעפל געדריקט 1 סעקונדע.
עצות
- ער דארף מעדיצין אדער סיילין כדי צו ארבעטן. מיט פשוט וואסער, וואסער פון קראן, אדער דיסטילירט וואסער אין בעכערל, שטעלט ער זיך אפ אליין.
- אויב עס מאכט זיך שוים און דער נעפל הערט אויף, מאכט אים אויס, שאקלט אים לייכט, און הייבט אן פון נייעם.
- בשעת דער באהאנדלונג קען מען הערן א זשומען; געוויינטלעך ווערט עס שטיל ווען מען שאקלט אים לייכט. שאקלט אים נישט שטארק ווען דאס בעכערל איז פול.
- אויב די מעדיצין איז אויס און ער ארבעט נאך אלץ, מאכט אים גלייך אויס.
רייניגן, נאך יעדער באהאנדלונג
א גיכע אויסשווענקונג
ליידיגט אויס דאס בעכערל. גיסט אריין בערך 2 מ״ל דיסטילירט וואסער, מאכט צו דאס דעקל, שאקלט 10 סעקונדעס, און גיסט עס אויס.
לאזט לויפן דעם זעלבסט־רייניג־פראגראם
פילט אן דאס בעכערל מיט ריין וואסער. ווען דער אפאראט איז אויס, האלט דאס אן־אויס־קנעפל געדריקט בערך 5 סעקונדעס. דאס לעמפל בייט זיך גרין, בלוי און געל בשעת ער רייניגט. ער שטעלט זיך אפ אליין נאך בערך 5 מינוט, אדער האלט דאס קנעפל געדריקט 1 סעקונדע כדי אים פריער אפצושטעלן.
וואשט דאס בעכערל און די מאסקע
נעמט זיי אראפ, און שווענקט זיי אויס אונטער ווארעם וואסער פון קראן א מינוט. וואשט זיי אין ווארעם וואסער מיט א ביסל כלים־זייף (בערך 1 מ״ל אויף א ליטער). גייט איבער אומעטום מיט א ווייך בערשטל, אויך אויף די לופט־לעכער פון דער מאסקע. שווענקט זיי דערנאך אויס נאך א מינוט.
ווישט אפ דעם אפאראט און די קאנטאקטן
ווישט אפ דעם אפאראט מיט א פייכטער שמאטע, און טריקנט אים דערנאך אפ. רייניגט די מעטאלענע קאנטאקטן אויפן אפאראט און אויפן בעכערל מיט א וואטע־שטעקעלע איינגעטונקען אין דיסטילירט וואסער.
טריקנט און לייגט אוועק
לאזט אלץ טרוקענען אין דער לופט כאטש 12 שעה, אדער טריקנט עס מיט ריינער גאזע. טוט צוריק אן דאס היטל, און האלט אים ריין און טרוקן, ווייט פון דירעקטער זון.
דעזינפיצירט פון צייט צו צייט
ווייקט איין דאס ריינע בעכערל און די ריינע מאסקע אין 70% אלקאהאל, כאטש 5 מינוט. שווענקט זיי אויס מיט דיסטילירט וואסער א מינוט, און לאזט דאס וואסער דורכרינען דורך די לופט־לעכער פון דער מאסקע. לאזט זיי אינגאנצן אויסטריקענען.
וואס מען טאר נישט טאן
- לייגט קיינמאל נישט אריין דעם אפאראט אליין אין וואסער אדער אין סיי וועלכן דעזינפעקציע־מיטל. ווישט אים נאר אפ.
- קאכט קיינמאל נישט די טיילן, טריקנט זיי נישט אין א מייקראווייוו, און לייגט זיי נישט אין א דיש־וואשער.
- רייניגט אים קיינמאל נישט מיט שארפע כעמיקאלן ווי בענזאל אדער פארב־פארדינער.
- לאזט אים קיינמאל נישט ארבעטן מיט א ליידיגן בעכערל.
אויב עפעס ארבעט נישט
ער גייט נישט אן
- לאדט אים אן, און פרובירט נאך א מאל.
- זעט אז דער לאד־קאבל איז גוט אריינגעשטעקט.
ער גייט אן, אבער ס'קומט נישט קיין נעפל
- אויב דאס לעמפל בלינקט געל, איז די באטארייע שוואך. לאדט אים אן.
- רייניגט די מעטאלענע קאנטאקטן אויפן אפאראט און אויפן בעכערל, און פרובירט נאך א מאל.
- זעט אז דאס בעכערל איז אריין אויפן ארט מיט א קליק.
- לאזט לויפן דעם זעלבסט־רייניג־פראגראם. אויב עס קומט נאך אלץ נישט קיין נעפל, דארף מען בייטן דאס בעכערל. רופט אונז.
דאס גרינע לעמפל פולסירט (ווערט פאמעלעך העל און טונקל) 10 סעקונדעס, און דערנאך שטעלט ער זיך אפ
- גיסט צו מעדיצין; עס קען זיין אז דאס בעכערל איז ליידיג.
- ניצט מעדיצין אדער סיילין, נישט פשוט אדער דיסטילירט וואסער.
- זעט אז דאס בעכערל איז אריין אויפן ארט מיט א קליק, און אז די קאנטאקטן זענען ריין.
- נייגט דעם פאדערשטן טייל צו אייך, כדי די פליסיגקייט זאל אנרירן דאס נעפל־פלעטל.
ער שטעלט זיך אפ אין מיטן א באהאנדלונג
- דאס בעכערל קען זיין ליידיג. גיסט צו מעדיצין.
- נייגט דעם פאדערשטן טייל צו אייך, כדי די פליסיגקייט זאל אנרירן דאס נעפל־פלעטל.
- ער שטעלט זיך אויך אפ נאך 20 מינוט. דריקט און האלט דאס קנעפל כדי ווידער אנצוהייבן.
די מעדיצין רינט ארויס
- גיסט אויס די מעדיצין וואס איז העכער פונעם שטריך, און הייבט אן פון נייעם.
- האלט אים פעסט בשעת דער באהאנדלונג.
- אויב דאס בעכערל איז צעשפאלטן, אדער זיין אפדיכטונג איז אפגענוצט, דארף מען עס בייטן. רופט אונז.
טעכנישע פרטים
| וואג | בערך 98 גראם (3.5 אונצן) |
|---|---|
| גרייס | בערך 50 × 51 × 115 מ״מ (2 × 2 × 4.5 אינטש) |
| מעדיצין־בעכערל | בערך 10 מ״ל |
| וויפל נעפל | כאטש 0.2 מ״ל א מינוט |
| גרייס פון די טיילעכלעך | בערך 3 מיקראן (MMAD) |
| גערויש | 50 דעציבעל אדער שטילער |
| באטארייע | איינגעבויטע ליטיום־באטארייע, 3.7 וואלט, 600 mAh; ביז 2 שעה ניצן נאך 15 מינוט אנלאדן |
| אנלאדן | USB-A צו USB-C קאבל, 5 וואלט / 1 אמפער |
| שטעלט זיך אפ אליין | נאך 20 מינוט |
| טעמפעראטור ביים ניצן | צווישן 5 און 40 גראד צעלסיוס (41 ביז 104 גראד פארענהייט) |
גוט צו וויסן.
ווי אזוי ניצט מען דעם זעלבסט־רייניג־פראגראם?
גיסט ריין וואסער אין בעכערל (בערך 6 מ״ל ביים קינדער־מאדעל) און מאכט צו דאס דעקל. האלט דאס אן־אויס־קנעפל געדריקט בערך 5 סעקונדעס, ביז דאס לעמפל צינדט זיך אן און הייבט אן בייטן קאלירן. דערנאך ארבעט דער נעבולייזער אין קורצע שטויסן: ער מאכט זיך אליין אן און אויס, ווידער און ווידער, כדי אפצושאקלען די מעדיצין וואס איז געבליבן אויפן נעפל־פלעטל. דריקט ווידער דאס קנעפל כדי אים אפצושטעלן; דער מאדעל פאר דערוואקסענע שטעלט זיך אויך אפ אליין נאך בערך 5 מינוט. אטעמט נישט אריין דעם נעפל, און גיסט אויס דאס וואסער ווען ער איז פארטיג.
וועלכן מאדעל האב איך?
דער קינדער־מאדעל איז בלוי, גרין, אראנזש אדער ווייס, מיט א געמאלט פנימל, און זיין אראנזשער שנאבל איז דאס קנעפל. דער מאדעל פאר דערוואקסענע איז אראנזש, מיט א קיילעכדיג ווייס אן־אויס־קנעפל.
וועלכע מאסקע זאל איך ניצן?
די קלענערע מאסקע איז פאר קינדער, און די גרעסערע פאר דערוואקסענע. א מאסקע דארף צודעקן סיי די נאז סיי דאס מויל. דערוואקסענע וואס ווילן ליבער אטעמען דורכן מויל קענען אנשטאט דעם ניצן דאס מויל־שטיקל.
קען איך אריינגיסן פשוט וואסער פאר א באהאנדלונג?
ניין. ניצט נאר די מעדיצין אדער סיילין וואס דער דאקטער האט פארשריבן. דער מאדעל פאר דערוואקסענע שטעלט זיך אפ אליין ווען ס'איז פשוט אדער דיסטילירט וואסער אין בעכערל. ריין וואסער איז נאר פארן רייניג־פראגראם, און דעם נעפל זאל מען נישט אריינאטעמען.
פאר וואס האט ער זיך אפגעשטעלט אליין?
ביידע מאדעלן שטעלן זיך אפ נאך 20 מינוט, און אויך ווען דאס בעכערל ווערט ליידיג. ביים מאדעל פאר דערוואקסענע מיינט א געל לעמפל וואס בלינקט, אז די באטארייע איז שוואך; און א גרין לעמפל וואס פולסירט, אז די פליסיגקייט קומט נישט אן צום נעפל־פלעטל.
איז נארמאל אז א ביסל מעדיצין בלייבט אין בעכערל?
יא. א קליין ביסל בלייבט אלעמאל. גיסט עס אויס נאך יעדער באהאנדלונג, און היט עס נישט אפ.
קען איך אים ניצן בשעת ער לאדט זיך?
ניין. לאדט אים פריער אן, און גיט דערנאך די באהאנדלונג. דער מאדעל פאר דערוואקסענע ארבעט נישט בשעת ער איז אריינגעשטעקט צום אנלאדן.
ווען דארף מען בייטן טיילן?
בייט א מאסקע וואס ווערט צעשפאלטן, ווערט שטייף, אדער שליסט מער נישט גוט צו. בייט דאס בעכערל אויב עס מאכט נאך אלץ נישט קיין נעפל נאכן רייניגן. רופט אונז פאר נייע מאסקעס און מויל־שטיקלעך.
טראגבארער אולטראסאנישער נעבולייזער
לייכט און גרינג צו טראגן
קליין גענוג פאר א טאש אדער א קעשענע, אזוי אז די באהאנדלונג איז אלעמאל ביי דער האנט.
דריי גיכקייטן
א מעלה וואס נאר ווייניג טראגבארע נעבולייזערס האבן. מיט דריי גיכקייטן קען מען צופאסן די באהאנדלונג צום פאציענט און צו דער מעדיצין.
רייניגט זיך אליין
אן איינגעבויטער רייניג־פראגראם רייניגט דעם נעבולייזער נאכן ניצן, אזוי אז ער איז גרייט פאר דער קומענדיגער באהאנדלונג.
זייער שטיל
שטיל גענוג צו ניצן אין סקול, ביי דער ארבעט, אדער לעבן א קינד וואס שלאפט.
ליטיום־באטארייע וואס האלט לאנג
ביז צוויי שעה ניצן אן אן אויפהער נאך 15 מינוט אנלאדן, בערך ווי מען לאדט א ביסל אן א טעלעפאן.
ארבעט מיט איין קנעפל
פשוט צו ניצן פאר קינדער און דערוואקסענע גלייך, און קליניקן איבערן גאנצן לאנד פארלאזן זיך שוין אויף אים.
דער זעלבער נעבולייזער, פינף מינים
- פאר קינדער, בלוי
- פאר קינדער, גרין
- פאר קינדער, אראנזש
- פאר קינדער, ווייס
- פאר דערוואקסענע, אראנזש
געמאכט פון US Brace & Limb Co. (USBL).
האט איר נאך א פראגע? רופט אונז.
מיר ענטפערן מאנטאג ביז פרייטאג, פון 9 אין דער פרי ביז 5 נאך מיטאג, ניו יארקער צייט. מיר האבן אויך טיילן אויף צו בייטן: מאסקעס אין צוויי גרייסן, מויל־שטיקלעך, רערלעך, און פילטערס פאר די נעבולייזערס וואס מיר גיבן. רופט אונז מיט אייער נאמען און וואס איר דארפט, און מיר וועלן נאכקוקן וואס אייער אינשורענס דעקט און עס אייך צושיקן.
ארויס פון אונזערע שעהען, רופט אייער דאקטער אדער אפטייקער מיט פראגעס וועגן אייער מעדיצין. ווען ס'איז שווער צו אטעמען, רופט 911.
דער וועגווייזער אויפן אינטערנעט: wellness-supplies.com//how-to-use/ultrasonic/yi